COMPETICIÓN OFICIAL

COMPETICIÓN I

SÁBADO, 29 OUT | 19:00

VOLTAR DO MAR

David Pérez, Rodrigo Martínez e Mikel Puertas

País: España (Galicia)
Ano: 2022
Duración: 9 min.
V.O.: galego (subtítulos en inglés)

A relación entre o mar e o ser humano sempre tivo dúas caras. O 17 de xuño de 2021 tivo lugar o naufraxio do barco cerqueiro ‘Sempre Güeto’ en augas de Cedeira, ó norte de Galicia. Dos dez integrantes da tripulación, oito conseguiron sobrevivir. Un deles, Juan Olveira, reflexiona sobre o accidente e o que vén despois dunha traxedia así. Desgraciadamente, os naufraxios son habituais en Galicia, mais ninguén pode chegar a acostumarse a perder a alguén no mar ou á proximidade da morte.

TATUADO NOS OLLOS LEVAMOS O POUSO

Diana Toucedo

País: España (Galicia)
Ano: 2022
Duración: 26 min.
V.O.: galego (subtítulos en inglés)

As mariscadoras dunha pequena vila ao sur de Galicia afánanse cada día de marea por sementar, cavar e coidar o limiar entre a auga do mar e a area. Ese espazo no que cultivar un froito prezado, é tamén un espazo relacional que as une colectivamente, abríndolles a posibilidade dos apoios emocionais, morais, femininos, afectivos e de conciencia traballadora. Unha nova conciencia colectiva que emerxe nelas, intuíndo así que non soamente realizan un traballo artesanal, senón que son unha rede de afectos que transforma o mundo que habitan.

LA MER EN HÉRITAGE

Mégane Murgia

País: Francia
Ano: 2021
Duración: 26 min.
V.O.: francés (subtítulos en galego)

Impulsado polo vento nas velas e as ondas na beira, Kélou está visceralmente unido ao océano. Construíu a súa vida escoitando aos elementos da natureza e multiplicando as súas actividades para gozar dos praceres que lle ofrece o mar nas distintas estacións. Con todo, para poder vivir na costa, decidiu traballar como pescador. Así descubriu este mundo misterioso, que deu forma á súa rexión, ao suroeste de Bretaña. Mentres que, no pasado, nacer xunto ao mar era unha extensión de riqueza a conquistar, hoxe en día o océano é unha elección, unha convicción.

COMPETICIÓN II

SÁBADO, 29 OUT | 21:00

ATALAIA/PIUEIRO

Xisela Franco

País: España (Galicia)
Ano: 2022
Duración: 8 min.
V.O.: galego (subtítulos en inglés)

Unha aproximación ao mundo do mar desde a etnografía experimental, entre o documental e a poesía. Para a primeira parte da obra contouse coa colaboración da Asociación de Redeiras do Baixo Miño ‘Atalaia’, mentres que na segunda parte traballouse man a man coa Asociación de Embarcacións Tradicionais ‘O Piueiro’. Este díptico terra/mar — masculino/feminino trata de dar visibilidade ao patrimonio inmaterial de A Guarda, crear emocións arraigadas ao territorio e á súa xente mediante a antropoloxía audiovisual.

INTERMÈDE (ΧΟΡΙΚΟ)

Maria Kourkouta

País: Francia / Grecia
Ano: 2022
Duración: 24 min.
V.O.: grego (subtítulos en galego)

Imaxes dun pequeno estaleiro nalgún lugar de Grecia. Auga, corpos, cordas, cadeas, madeira e metal nun poema fílmico en branco e negro rodado en 16 mm. Entre a reparación das embarcacións e a súa navegación, un grupo de homes sacan os barcos a terra e empúxanos de novo á auga, unha vez arranxados. Este intermedio é un espazo de tempo intenso e á vez delicado, como o interludio coral dunha antiga traxedia feita de xestos e movementos que oscilan entre a proximidade e a distancia, entre a unión e o desapego, entre a tensión e a tenrura.

THE BOAT BUILDERS (BÅTBYGGERNE)

Sveinung Uddu Ystad e Jon Terje Hellgren Hansen / Forbundet KYSTEN

País: Noruega
Ano: 2022
Duración: 28 min.
V.O.: noruegués (subtítulos en galego)

Acompañamos a tres novos construtores de barcos e aos seus mestres, que traballan en tres lugares diferentes da costa norueguesa. Tanto os construtores novos como os máis veteranos falan do oficio, da tradición e da transmisión dos coñecementos artesanais tradicionais ás novas xeracións. Estes barcos son sólidos, pero os coñecementos son fráxiles. Non quedan moitos construtores de barcos tradicionais. Os que posúen estes coñecementos atesouran un patrimonio cultural vivo que se remonta á época viquinga.

COMPETICIÓN III

DOMINGO, 30 OUT | 17:00

AFTER ICE

Kieran Baxter

País: Reino Unido / Islandia
Ano: 2021
Duración: 12 min.
V.O.: inglés (subtítulos en galego)

Os glaciares amósannos probas innegables de que os cambios climáticos están a ocorrer e de que os seres humanos están a transformar os sistemas da Terra. Os glaciares reflicten o noso pasado e revelan o noso futuro. Combinando vistas aéreas históricas e actuais de seis glaciares da rexión de Hornafjörður, no sueste de Islandia, este documental expón un mundo xeado que desaparece a gran velocidade. Se a crise climática semella unha ameaza invisible noutras partes do mundo, aquí está escrita na paisaxe. Estes glaciares mostran como o que lle pasa ao xeo tamén nos ocorre a nós.

LE CONSTAT DE LA CREVETTE GRISE

Rémi Murez

País: Bélxica
Ano: 2021
Duración: 22 min.
V.O.: neerlandés, árabe, francés (subtítulos en galego)

Enterrado baixo o opaco e gris Mar do Norte, un monstro de ferro e gas ameaza a costa belga. Preto de 35.000 toneladas de municións químicas están enterradas no fondo do mar. Os restos das guerras de onte segregan gases tóxicos na actualidade, que poden ter efectos devastadores nos humanos, desde os barcos de pesca ata os mercados e as tendas de delicatessen. Os camaróns seguen o seu camiño, as gaivotas presaxian a morte,… Que farán os humanos?

LIQUID GROUND

Enar de Dios

País: Austria / España (Galicia)
Ano: 2021
Duración: 32 min.
V.O.: inglés (subtítulos en galego)

Aínda cando os océanos conforman o 70% da Terra, ata o momento só existen mapeos dunha parte moi pequena dos fondos mariños. Con todo, nos últimos anos, o interese por mapear estes espazos acelerouse debido a diferentes intereses económicos, xeopolíticos e científicos, empeñados en construír un “novo continente” por explo(t/r)ar baixo o mar. Este vídeo ensaio toma como eixo temático os fondos oceánicos e a súa cartografía para falar do colonialismo, a ecoloxía e a representación.

COMPETICIÓN IV

DOMINGO, 30 OUT | 19:00

PEZ VOLADOR

Nayra Sanz Fuentes

País: España
Ano: 2022
Duración: 14 min.
V.O.: español (sen diálogos)

Durante miles de anos e en diferentes culturas, o peixe voador entendeuse como un símbolo de procura, de liberdade e de superación. É un animal singular que nada e voa, que penetra nas augas e atravesa o aire reflectindo a posibilidade de esperanza. O seu tránsito entendeuse como unha viaxe observacional a través da natureza, pero a incidencia do ser humano e a tecnoloxía fanse cada vez máis presentes, transformando e alterando a súa contorna…

XAAR YALLÀ

Mamadou Khouma Gueye

País: Senegal / Francia
Ano: 2022
Duración: 25 min.
V.O.: wólof, francés (subtítulos en galego)

Ela aproxímase a nós. Ela vén na nosa dirección. Ela móvese connosco. Ela perségueme. Xa non consigo moverme con ela. Nunca máis verei o seu fermoso horizonte. Non quero ficar sen a súa fresca brisa matinal. Ela deume todo. Ela é o mar. Ela avanza cara a cidade de Saint-Louis, a “Venecia do Sur”, na que algúns distritos, Guet Ndar e Ndar Toute, situados entre o mar e o río, están en risco de desaparecer, ao igual que Ndoud Baba Diéye, unha illa nas proximidades…

LAST OF US. The Last Fishermen of the Lake

Andrea Marcovicchio

País: Italia
Ano: 2021
Duración: 28 min.
V.O.: italiano (subtítulos en galego)

Apenas quedan 25 pescadores no Lago Maggiore, os últimos gardiáns de historias e coñecementos antigos, case esquecidos. Un retrato dun mundo que desaparece e unha vida totalmente vinculada ao lago, lonxe dos ruídos do mundo moderno que se impón inexorablemente. A pesca xa non é o que era. O traballo é máis fácil, pero ten un destino incerto. A través das súas voces e historias, imaxes do pasado e fotografías do presente, os últimos pescadores revélanse nos seus segredos íntimos que, no futuro, talvez ninguén volverá gardar.

COMPETICIÓN V

DOMINGO, 30 OUT | 21:00

THE SILENT WAVE

A fisheries cooperative in India responds to Covid-19
Abraham e Vishnu Hari / ICSF

País: India
Ano: 2021
Duración: 18 min.
V.O.: hindi (subtítulos en galego)

En marzo de 2020 impúxose un peche a todas as actividades pesqueiras en Kollam, no estado de Kerala, ao sur da India. Rodado durante o apoxeo da primeira vaga de Covid-19, este documental narra a historia de como os pescadores de Kollam se enfrontaron ao confinamento e ás alteracións no seu traballo. A cooperativa local introduciu un importante cambio no sistema de poxas, destinado a garantir a seguridade da comunidade pesqueira e a corrixir o desequilibrio de poder entre pescadores e comerciantes. Porén, o novo sistema tivo algunhas consecuencias inesperadas.

MAYOTTE, LA MER BUISSONNIÈRE

Pierre Belet

País: Francia
Ano: 2021
Duración: 52 min.
V.O.: francés (subtítulos en galego)

Mayotte é a illa dos nenos: a metade da poboación ten menos de 18 anos. Con todo, está lonxe de ser un paraíso. Ante a pobreza, a inmigración ilegal e a delincuencia incontrolada, os mozos séntense abandonados e illados neste territorio de augas translúcidas… Algúns deles decidiron tomar as rendas do seu destino e facer do océano o seu mellor aliado, a pesar dos prexuízos, as crenzas locais e a súa difícil e ás veces perigosa vida cotiá. Soñan con ser mergulladores, exploradores, cociñeiros ou pescadores. O mar é a súa esperanza, o seu salvavidas.

XURADO OFICIAL

EVA LODEIRO

Laracha, 1987

Editora de vídeo e posprodutora cunha ampla traxectoria internacional. Parte do seu percorrido profesional ocupouno con proxectos relacionados coa conservación e o coidado do medio mariño. Tamén foi profesora de distintas especialidades audiovisuais na Universidade de Ecuador.

LARA CAPEÁNS

A Coruña, 1988

Realizadora e editora audiovisual, especializada en cinema documental e seleccionada en diversos certames. Dedícase principalmente á dirección, realización e montaxe audiovisual e fotográfica. Tamén exerce como docente de realización audiovisual e interpretación.

XOSÉ ZAPATA

Carral, 1975

Director e produtor. Nomeado aos Premios Goya en varias ocasións e premiado na categoría de mellor curtametraxe de animación na edición do 2022 pola súa obra The Monkey. Na súa ampla traxectoria produciu máis de corenta pezas, entre curtas, documentais e longametraxes.